Далас Маверикс, шампион во западната конференција

Далас Маверикс ќе игра во своето второ големо финале во историјата, прво по 2006. година, откако во петтиот меч успеа да ги реши колегите од Оклахома Тандер со 100-96 и да извојува конечна победа од 4-1 во серијата.Натпреварот беше изедначен до самиот крај, а клучен кај домаќините беше повторно големиот Дирк Новицки, постигнувајќи „тројка“ на 1:14 до крај со која Далас го превзеде водството и психолошката предност во однос на гостинските кошаркари. Дирк натпреварот го заврши со 26 коша, вклучувајќи ги и двете слободни фрлања на 13,3 секунди до крајот. Покрај Германецот, кај Маверикс 26 поени уфрли и одличниот Шон Мерион.

Во редовите на Оклахома најпрецизен беше Расел Вестбрук со 31 поен, додека Кевин Дурант и Џејмс Харден додадоа по 23. Oклахома покажа карактер, се бореше до самиот крај и најави дека во наредните години ќе е екипа на која ќе мора да се смета до самиот крај на сезоната.

Далас својот противник во финалето може да го добие уште вечерва, бидејќи Мајами Хит има предност од 3-1 против тимот со најдобриот скор во регуларниот дел на сезоната Чикаго Булс.

Своето единствено НБА финале досега Маверикси го одиграа токму против Мајами во 2006. кога имаа предност од 2-0 во серијата и солидно водство во третиот натпревар, за на крај да загубат во шест натпревари.