Најдобрата пријателка во 8 точки

Сигурно и вие имате многу пријателки, но само една од нив е вашето рамо за плачење во секој миг од денот и ноќта, вашиот партнер за смеење, вашиот придружник во најбесмислените лудости и вашата сестра по душа.

Без да ја видите или чуете не можете да си го замислите денот, а за долгите заеднички разговори секогаш имате непресушен извор на теми.

Ги анализирате сегашните момчиња

Од испади на љубомора до детали од сексуалниот живот се може да се најде на вашето мени за разговор. Таа знае речиси се за вашето момче, а и без да и кажете ги знае вашите чувства и размислувања за него. Некогаш не се согласувате со вкусот една со друга, но секогаш си го поддржувате направениот избор.

Ги оговарате поранешните момчиња

Само со неа во една вечер успевате да воскреснете години стари љубовни збиднувања. Говорите за поранешните партнери, се сеќавате на нивните позитивни страни, но и за нивните моментални нерационални постапки со кои се обидуваат да ви го привлечат вниманието. Само таа знае колку пати на ден го споменувавте неговото име кога бевте на „крилјата на љубовта“ со него.

Си слушате музика што само вие две можете да ја поднесете

Слушате музика, одите на места и ги правите најголемите лудости на кои никој друг „нормален“ човек не би се согласил. Ако една ќе каже „ајде“, другата веднаш тргнува и обратно.

Си готвите најчудни јадења

Знаете да си направите заедничка вечера, без разлика што готвењето и не е вашата најсилна страна. Чудниот вкус од ново компонираниот рецепт на торта не ве спречи да вкусите парче од неа бидејќи тоа е дело на вашата најдобра пријателка.

Заедно си плачете

Раскинавте со дечкото, а таа плаче на сет глас рамо до рамо со вас или пак во екстремни случаи таа плаче дури и кога вие само и раскажувате колку сте тажна. Од толку многу заеднички минати мигови чувството на меѓусебна емпатија е на највисоко можно ниво. Секогаш говорите, анализирате и нормално заклучокот е дека тој е „кретен“, а вие сте во право.

Заедно пеете (иако немате талент)

Си пеете на сет глас, во моменти на досада, дури и импровизирате концерти кои некогаш завршуваат забележани од камерата на вашиот мобилен телефон. Години потоа се смеете на тоа и се чудите како пред неа пеете од се срце, а пред другите себично го криете вашиот „огромен талент“.

Се имате видено во секое издание

Знае како изгледате кога ќе станете наутро од спиење, кога сте болна, но и кога се спремавте за вашата апсолвентска забава. Критиките си ги кажувате најотворено без влакна на јазикот, како што можете со ретко кој. Си кажувате се што ќе ви падне на ум без потоа да се налутите меѓусебно.

Ја познавате како што се познавате себе си

Знаете кога се смее вештачки, кога е тивка, а сака да плаче на сет глас, знаете кога е вистинската таа, а кога ја става маската пред одредени луѓе кои и не и се баш омилени. По сјајот во очите се познавате меѓусебно дали сте заљубени во сегашното момче или само сакате да бидете дел од врска. Таа знае која сте, што сте, како размислувате и што сакате во животот.

Животот без неа ви е тешко замислив, зарем не?