Фудбалерите на Реал: Фудбалот е игра за мажи, судијата го уништи натпреварот

Фудбалерите на Реал Мадрид, после поразот од Барселона на домашен терен се приклучија во вербалната војна која ја отвори нивниот шеф Жозе Мурињо.

Новото засилување во редовите на Реал Мадрид, Емануел Адебајор после натпреварот изјави:

„За неколку дена играв три пати против Барселона и секогаш требаше да играме со 10 фудбалери, не можам да поверувам“, се пожали напаѓачот на Реал Мадрид.

„Можеби Пепе изврши прекршок, но не мислам дека тој беше за црвен картон, а откако останавме со играч помалку на тимот му беше многу потешко. Ние сепак веруваме дека можеме да успееме во реваншот на Камп Ноу“.

„Фудбалот е игра за мажи. Секој пат кога играме против Барселона, кога и да ги фаулираш, тие паѓаат долу и започнуваат да плачат како бебиња. И нивните тренери и нивните фанови секогаш плачат“, додаде Адебајор.

Капитенот на Реал Мадрид, Икер Касиљас исто така беше разочаран после поразот од Барселона. „Не разбирам, секогаш завршуваме со 10“, се пожали голманот на белите.

„Многу строг беше црвениот картон. Оваа сезона често пати се случува да играме со човек помалку. Ќе дадиме се од себа во Барселона, за да направиме пресврт“, прокоментира Икер.

Чаби Алонсо доста остро го критикуваше судијата за покажаниот црвен картон. „Му кажав на Штарк дека го уби натпреварот“, довери играчот за врска после натпреварот.

„Такво нешто не е за отстранување од игра, тоа беше борба за топка, имено токму тоа го реши натпреварот. Ова сепак не е ништо ново. Видовте и на претходните два натпревари. Црвениот картон на Пепе го реши натпреварот, жално но вистинито“, категоричен беше Чаби Алонсо.