Фризури – трендови за пролет/лето 2011

Плетен неред

Плетенките сè уште не го отстапуваат своето место меѓу трендовите, но оваа сезона нè поттикнуваат повеќе да експериментираме. Прескокнете ги едноставните плетенки и обидете се со плетење на косата да направите бушава фризура. Колку понеобично, толку подобро.

Ултра волумен

И кога веќе знаеме дека стилот од 70-тите е основа за модните трендови оваа сезона, јасно е дека не можеме да поминеме без многу волумен и афро фризури. Сплетете ја водената коса во плетенки, а потоа исушете ја и растурете ги плетенките. Тоа е најлесниот начин да го примените трендот „ултра волумен“.

Екстремен патец настрана

Секоја фризура можете да ја направите тренди ако патецот на косата ви е настрана, ама многу настрана. Пуштете ја косата слободно, направете си патец на левата страна и со шнола прицврстете ги шишките на десната страна. Толку лесно, а толку убаво и модерно.

Супер мазна и сјајна коса

Како контраст на трендот „ултра волумен“ се јавува трендот на замазнета сјајна коса. Ако ја обожавате фризурата коњско опавче, направете ја така што убаво ќе ја залижете косата за главата, без да летаат малечки влакненца на сите страни. Фиксирајте ја косата со гел или восок. Познатите стилисти препорачуваат да ја залижувате косата во горниот дел на главата дури и ако ја носите пуштена, но тој мини тренд најверојатно ќе си остане само на модните писти.

Брановидни романтични прамени

Скоро е безбедно да кажеме дека брановидната коса е тренд кој засекогаш ќе биде актуелен и пожелен. Прво, затоа што е лесен, а второ, затоа што е неверојатно секси, женствен и романтичен.

Балерина пунџа и кок

Направете си балерина пунџа или кок во долниот дел на главата или многу високо на темето на главата. Подеднакво актуелни се и идеално средените и разбушавените несредени пунџи. Изборот е ваш.

Бујни кратки шишки

Стилот од 70-тите ни донесе уште еден тренд – густи кратки и скоро рамни шишки. Експертите препорачуваат шишките да бидат бујни, малку подолги на страните и да ги покриваат веѓите.

Шноли, шноли, шноли

Класичните правоаголни шноли се вратија во мода. Оние кои пред десетина години ги исфрлија, сега ќе треба да се снабдат со нови. Најпромовиран тренд е коса со патец настрана и шишки фатени со шнола. Но, исто така шнолите може да се користат за декорирање на пунџа, коњско опавче и сл.

ТРЕНДОВИ КАЈ БОИТЕ ЗА КОСА

Козметичкиот пазар нуди стотици различни нијанси на бои за коса. Но, кои од нив ги препорачуваат стилистите оваа сезона?

Русокоса. Ако минатата година модерни беа платинестите нијанси кои потсетуваат на скандинавските русокоси, оваа година во мода се потопли нијанси. Најдобриот избор се луксузните златни нијанси. Така сонцето уште повеќе ќе го потенцира сјајот во вашата коса.
Бринета. Заборавете на топлите нијанси на карамела и лешник кои беа актуелни минатата година. Сега тренди се поладните нијанси како млечно чоколадо. Изберете потемна боја и нема да зажалите. Доколку сте бринета, особено е важно да внимавате вашата коса да биде сјајна.
Црвенокоса. Не се знае дали тоа се должи на влијанието на Ријана, Кристина Хендрикс или на Флоренс Велч, но црвената боја станува сè попопуларна. Модерни се и потемните и посветлите нијанси. Доколку имате темен тен, нема да погрешите ако се насочите кон боја со праскова или портокалова основа, а ако имате светол тен, пробајте да ја истакнете убавината на вашата коса со посветла и посилна црвена.

Коса „Омбре“

Меѓу најпопуларните трендови за коса за сезоната пролет/лето 2011 се вбројува трендот „омбре коса“ или поразбирливо кажано, „постепено осветлување“. Бојата на косата е најтемна во корените на влакното и постепено се осветлува движејќи се кон врвовите, за на крајот да стане скоро руса. Изгледот се постигнува со постепена градација на бојата.