„Тhe Tree of Life“ - победник на Кан 2011

Златната палма на 64. Кански филмски фестивал ја доби филмот на американскиот режисер Теренс Малик, „The Tree of Life“.Во име на режисерот кој не ги љуби камерите од страната од која нема контрола, наградата ја прими Бил Похлед, еден од продуцентите на филмот во кој се појавуваат Бред Пит, Шон Пен и Џесика Частејн.

Гран При-то на канскиот фестивал го поделија филмовите „Once Upon a Time in Anatolia“ на турскиот режисер Нури Б. Цејлан и „Le Gamin Au Velo“ на белгијанците Жан-Пјер и Лук Дарден.

Наградата за најдобра женска улога и припадна на Кирстен Данст за улогата на депресивна жена во филмот „Melancholia“ на непожелниот во Кан Ларс фон Трир. Кај мажите победи Францускиот актер Жан Дужардан, кој во филмот „The Artist“ на Мишел Хазанавициус глуми ѕвезда на немиот филм.

Наградата за режија ја доби данскиот режисер Николас Виндинг Рефн за филмот „Drive“, додека најдоброто сценарио според Канскиот фестивал е она на Израелецот Жозеф Цидар, за „Footnote“.

Златната камера, која се доделува за најдобро прво филмско остварување, ја доби Аргентинецот Пабло Џорџели за филмот „Las Acacias“.

Најдобар краткометражен филм е „Cross Country“ на Украинката Марина Врода.